2Ti 2 | NdeIBE | STEP | Ngakho-ke wena ndodana yami, qina emuseni okuKhristu uJesu.

2 Timothy 2

1 Ngakho-ke wena ndodana yami, qina emuseni okuKhristu uJesu. 2 Izinto owangizwa ngizitsho phambi kwabofakazi abanengi ziphathise abantu abathembekileyo abazafanela ukuba labo bafundise abanye. 3 Bekezelela ubunzima kanye lathi njengebutho elifaneleyo likaKhristu uJesu. 4 Kakho osebenza njengebutho ongenela ezindabeni zabangasibo bebutho – ufuna ukuthokozisa umlawuli wakhe. 5 Ngokufanayo, uma umuntu encintisa njengomdlali kawutholi umqhele wokunqoba ngaphandle kokuba encintisa mayelana lemithetho. 6 Umlimi osebenza kakhulu kumele kube nguye oqala ukuthola isabelo samabele. 7 Nakana ngalokho engikutshoyo, ngoba iNkosi izakupha umbono kukho konke lokhu. 8 Khumbula uJesu Khristu, owavuka kwabafileyo, wadabuka kuDavida. Leli yilo ivangeli lami 9 engilihluphekelayo ngize ngibotshwe ngamaketane njengesigangi. Kodwa ilizwi likaNkulunkulu kalibotshwanga. 10 Ngakho ngibekezelela konke ngenxa yabakhethiweyo, ukuze labo bazuze ukusindiswa okukuKhristu uJesu, lenkazimulo engapheliyo. 11 Nansi isitsho esiqotho: Uma safa laye sizaphila laye futhi; 12 uma sibekezela sizabusa laye futhi. Uma simphika, laye futhi uzasiphika; 13 uma singelalo ithemba yena uzaqhubeka ethembekile, ngoba angeke aziphike.

Isisebenzi esivunywe nguNkulunkulu

14 Qhubeka ubakhumbuza izinto lezi. Baxwayise phambi kukaNkulunkulu ngokuxabana ngamazwi; akulasizo, kuchitha labo abalaleleyo. 15 Yenza ubungcono bakho ukuba uzethule kuNkulunkulu njengohloliweyo, isisebenzi okungaswelekiyo ukuba sibe lenhloni njalo esiliphatha kuhle ilizwi leqiniso. 16 Xwaya izinkulumo zokweyisa uNkulunkulu ngoba abazikholisayo baqhubeka kokuphela besiba ngabameyisayo uNkulunkulu. 17 Imfundiso yabo izaqhela njengesilonda esibhibhidlayo. Phakathi kwabo kuloHimenawu loFilethu, 18 abaphambukayo eqinisweni. Bathi ukuvuka kwabafileyo sekwenzakala, njalo bachitha ukukholwa kwabanye. 19 Noma kunjalo isisekelo sikaNkulunkulu esiqinileyo sigxilile, sibekwe uphawu lombhalo lo othi: “Ujehova uyabazi labo abangabakhe,” lothi, “Bonke abalivumayo ibizo likaJehova kumele badele ububi.” 20 Endlini enkulukazi akulazitsha zegolide lezesiliva nje kuphela, kodwa lezezigodo kanye lezebumba; ezinye ngezemisebenzi encomekayo ezinye engayisilutho. 21 Uma umuntu ezihlambulula kokuhlazisayo, uzasetshenziswa emisebenzini encomekayo, angcweliswe, elosizo eNkosini yakhe njalo elungele ukwenza loba yiwuphi umsebenzi omuhle. 22 Balekela izinkanuko ezimbi zobutsha ufune ukulunga, lokukholwa, lothando kanye lokuthula, ukanye lalabo abakhuleka eNkosini ngezinhliziyo ezimhlophe. 23 Xwaya ukuphikisana kobuthutha lobuwula, ngoba uyakwazi ukuthi kudala ingxabano. 24 Inceku yeNkosi kumele ixwaye ingxabano; kodwa kumele ibe lomusa ebantwini bonke, yanelise ukufundisa, ingabi lenzondo. 25 Abaphikisayo kumele ibaluleke kuhle, ngethemba lokuthi uNkulunkulu uzabaguqula izinhliziyo baholelwe ekwazini iqiniso, 26 lokuthi bazaphaphama baphunyuke emjibileni kaSathane, obathumbele ukuba benze intando yakhe.